2025 оны 11 дүгээр сарын 19-ний өдөр Налайх дүүргийн Ахмадын хорооноос ахмад буурлуудын төлөөлөл Үйлдвэрлэл, технологийн парктай танилцаж, Аж үйлдвэрийн бүсчлэлд явагдаж байгаа үйлдвэрлэл болон бүтээн байгуулалтын явцтай танилцлаа.
Налайх дүүргийн хөгжлийн төлөө олон жил зүтгэж ирсэн ахмадууд маань тус парк 3-р хорооны нутаг дэвсгэрт шинэ үйлдвэрлэлийн бүсийг хөгжүүлж, томоохон хөрөнгө оруулалт татаж, дүүргийн иргэд, хөдөлмөрчдөд орчин үеийн технологийг нэвтрүүлэх, шинэ ажлын байр бий болгох чиглэлд бодит ажил хийж байгааг сайшаан үнэлэв.
Мөн тэд дэлхийн жишигт нийцсэн үйлдвэр болох “Электрокем Монгол” ХХК-ийн үйлдвэрлэлийн үйл явцтай танилцсан бөгөөд залуу үе, оюутан сурагчдад үйлдвэржилтийн ач холбогдлыг ойлгуулах, шинэ боломжуудыг таниулах, улмаар орон нутгийнхаа хөгжилд хувь нэмэр оруулах үйлсийг улам дэмжин ажиллана гэдгээ илэрхийллээ.
Уулзалтын үеэр дүүргийн ахмад тээвэрчин Г.Энхтөрт “Ахмад тээвэрчин – 100 жил” тэмдгийг Паркийн Гүйцэтгэх захирал гардуулан, түүний баярыг хуваалцсан дурсамжтай өдөр болж өнгөрлөө.
